Utho Sone Walo Sabera Hua Hai ।
Watan Ke Phakiron Ka Phera Hua Hai ॥
Utho Ab Nirasha Nisha Kho Rahi Hai
Sunhali-si Purab Disha Ho Rahi Hai
Usha Ki Kiran Jagmagi Ho Rahi Hai
Vihangon Ki Dhwani Nind Tam Dho Rahi Hai
Tumhen Kislie Moh Ghera Hua Hai
Utho Sone Walo Sabera Hua Hai ॥
Utho Budhon Bachchon Watan Daan Mango
Jawano Nai Zindagi Gyan Mango
Pade Kislie Desh Utthan Mango
Shahidon Se Bharat Ka Abhiman Mango
Gharon Mein Dilon Mein Ujala Hua Hai ।
Utho Sone Walo Sabera Hua Hai ॥
Utho Deviyon Vakt Khone Na Do Tum
Jage to Unhen Phir Se Sone Na Do Tum
Koi Phoot Ke Beej Bone Na Do Tum
Kahin Desh Apman Hone Na Do Tum
Ghadi Shubh Mahurat Ka Phera Hua Hai ।
Utho Sone Walo Sabera Hua Hai ॥
Hava Kranti Ki Aa Rahi Le Ujali
Badal Jane Wali Hai Shasan Pranali
Jago Dekh Lo Mast Phulon Ki Dali
Sitare Bhage Aa Raha Anshumali
Darkhton Pe Chidiyon Ka Phera Hua Hai ।
Utho Sone Walo Sabera Hua Hai ॥
- Vanshidhar Shukl